PREGÓN DEL XVICERTÁMEN DE LA CASTAÑA Y LES ARRIONDESPRODUCTOS DE LA GÜERTAAMIGOS DE PARRES
En primer llugar quisiera solicitar la presencia de tolos componentes del GRUPU AMIGOS DE PARRES pa que m’acompañen nesta tribuna, pues yo solo soi el portavoz de esti grupu que güei con gran allegría vamos a pregonar al altu la lleva esti XVI FESTIVAL DE LA CASTAÑA Y PRODUCTOS DE LA GÜERTA.
Agora col permisu de toles autoridaes y col de toos vosotros, entamamos el nuestru pregón:
Nun vos faceis a la idea de la gran allegría y satisfación que ye pa nosotros ser güei los protagonistas y pregoneros d’esti eventu festivu. Sentímonos igual que unos pas que ven, dempués de pasar unos años, que los sos fios triunfen na vida y sobre too que desfruten de bona salú. D’esa bona salú que desfruta el FESTIVAL DE LA CASTAÑA, qu’asina foi como entamó a nomase.
AMIGOS DE PARRES ye una asociación que ñaz nel 1990 col oxetivu de promocionar cultural y turísticamente el nuestru conceyu. Una de les primeres esmoliciones yera, naquellos años 90, alcontrar la manera de atraer al mayor númeru posible de xente, pues son Les Arriondes villa de milenta fiestas veraniegues, pero a lo llargo de tol ivierno nun teníamos denguna afayaiza. Entronos sana envidia del Fetival de l’ablana en Piloña, del quesu en Cabrales y Onís, de les fabes en Collunga… y decidimos facer daqué asemeyao nel nuestru pueblu. Puestos a cavilgar pensamos que yera posible que la xente, al menos de la fastera oriental, podíen visitanos si –yos ufirtásemos daqué prestoso.
Nun cabe duda de que el nuestru conceyu ye ricu en munches coses y n’ abondos productos de la güerta, asina que pensamos qu’un productu perabundante y que casique nun s’apañaba yera la castaña. Sabíamos qu’había n’Asturies dalgunos festivales de la castaña, como el de Aces en Candamu, y que se cellebraben munchos Amagüestos pelos pueblos y aldees d’Asturies. Prestonos el carácter social de los amagüestos que venín a ser casique como les esfoyaces, onde se contaben cuentos, cosadielles, dábense conseyes o n’onde les moces y los mozos tirabense los teyos. En fin que nos pareció lo más afayadizo pa facer un Festival. Lóxicamente les feches teníen que ser nestes dómines, la de les castañes. Nesos entamos del Festival tuvimos la suerte de cuntar con presones que,anque nun teníen una vinculación directa con Les Arriendes, volcáronse con nosotros. Asina cuntamos cola collaboración de Camino Fernández, naquelles dómines locutora de la cadena COPE en Ribesella y que foi la primera presentadora del Festival. Con Tino, el de la COPE, al qu’esti Festival de la Castaña y AMIGOS DE PARRES deben-y munches hores gratuites de publicidá durante los primeros años. Tino, collaciu, dende esti Festival, AMIGOS DE PARRES y dexuru que tolos que tamos equí, deseámoste que teas pronto bien pa seguir falando de too, pero sobre too d’esti Certamen de la Castaña. Cuntamos tamién cola collaboración del Ayuntamiento de Llanes, pues dexáronnos los puestos espositores y el so alcalde naquelles domines, D. Antonio Trevín Lombán, güei Delegáu del Gobiernu del Principáu d’Asturies, foi el primer pregoneru. Pa conseguir que viniere la xente con castañes y otros productos de la Güerta, tuvimos que caleyar polos pueblos del conceyu y tamién de los de la rodiada, desplicando-y a la xente lo que queríamos facer. Asina conseguimos xuntar a 21 espositores de castañes y de coses de la Güerta, vendiéndose nel Certamen casique media tonelá de castañes. Amás llogramos traer a ocho artesanos que-y aportaron un aquel más afayaizu al Festival. Lo meyor de too esto ye ver como güei munchos d’aquellos qu’entamaron nel añu 91, siguen, añu tras añu, viniendo. Pa dalgún d’ellos esto ye como pa nosotros, daqué suyu. Viennos al maxín que la primera ganadora nel apartáu de castañes foi Josefina Soto, la de La Llosona, y la primera nel apartáu de coses de la Güerta foi Dora Zapatero, de Gomezán, Ardisana de Llanes. A lo llargo d’estos 16 años estes dos participantes, xunto con otros munchos, non solo cosecharon castañes y coses de la Güerta, sinon tamién triunfos nes distintes modalidades.
No nos podemos escaecer de collaboradores dende el primer añu, como Ramón el Roque que s’axuntó a nosotros pa facer el primer Amagüestu y pa lo que ficiera falta, pues ye dende siempre un defensor dafechu de AMIGOS DE PARRES, foi el primer Premiu Fayuela de la nuestra Asociación y al que al títulu de “Rei del Merucu” nosotros queremos amesta-y el de “Amagüestador mayor del reino”, tamién foi el pregoneru más gayoleru que tuvo esti Festival, pues fizo un memorable pregón nel 2002.
Alcordámonos con cariño d’aquellos primeros grupos de baile y de gaites que-y dieron allegría a esti Festival: el grupu de gaites Principáu, el grupu de baile Ríu Sella y el grupu de baile y gaites “Güeña de Cangues d’Onís, col inolvidable Miliko a la cabeza. Too esto ficimoslo ensin denguna aportación económica, aquel primer añu, tolos gastos fueron del nuestru bolsu, anque sí cuntamos cola ayuda moral d’algunos y cola propaganda de la Caxa D’Aforros. Nosotros mesmos colocamos los puestos y tola infrastructura. A propósito de colocar, vamos cuntavos una anécdota que nos pasó al presentanos nel parque. Sedríen les 6´30 de la mañana cuando aportamos pa colocar los puestos y alcontramonos con que xustamente nel mediu el parque taba la castaña mayor qu’enxamás habíamos visto. Yera una castaña monumental que bailaba y falaba, bueno… balbuceaba. Faltonos tiempu pa ,ellí mesmu y sobre la marcha, nomálu castaña d’oru del Festival. Esto queda pa AMIGOS DE PARRESy pa dalgún otru que nos acompañaba, como Valentín, el de la Caxa d’Aforros. Nestos casosya sabéis que dizse el pecáu pero non el pecaor.
Esti primer Festival foi perexitosu, de público yd’espositores, polo que aquello que nun principiu parecía una aventura de AMIGOS DE PARRES convirtiose nun Festival seriu y dignu de tener en cuenta. Ya habíamos parido la criatura. Agora facien-y falta bonos padrinos.
El segundu Festival pregonolu otru buen collaciu: Luís José Ávila, periodista perconocíu y que yera naquel intre Presidente de la Asociación de la Prensa. Foron sucediéndose los festivales y superándose añu a añu. Amestaronse-y coses tales como el concursu de carteles y el de repostería, concursu al que tolos años los del Hospital de día dan-y un aquel especial. Más tarde amestose-y, con bon criteríu, por ciertu, EL CERTAMEN DEL MUEBLE Y DE LA MADERA, anque agora cellébrase en feches distintes. El colexu Públicu Ríu Sella tamién pasó a ser un collaborador importante, sobre too nos concursos de cartelos y na animación del Festival instalando los populares puestos que tolos años enllenen de rapazos y de papeletes de llotería de Navidá esta fiesta.
Pregonaron esti Certamén xente importante como los yá nomaos y a los qu’habría qu’amesta-yos a Melchor Fernández Díaz, pregoneru del tercer Festival y que yera daquella Director de La Nueva España. Angel Fabián de la cadena SER que nun pudo tar y que lu sustituyó Gabriel Fernández de ONDA CERO, o l’últimu pregoneru, el del añu pasáu, el veteranu periodista, yá xubiláu, de T.V. E, Lluís Fernández, vinculáu a Les Arriondes, n’otros tiempos al Descensu Internacional del Sella y a AMIGOS DE PARRES. Amás de Ramón el Roque, pregoneru nel 2002, toco-y ser pregoneru nel añu 1996 a D. Ricardo Jardón, personaxe queridu y respetáu por tolos parragueses y que nun pudo llegar a lleer el so pregón, anque ya lu tenía fechu, pues desgraciadamente falleció naquelles dies. Tocome a mi lleelu nel so nome. Pasaron pregoneros xóvenes, como l’historiador Alejandro Miyares, al que dalgún dia prestaríanos abondo velu como cronista oficial del conceyu de Parres. Nacho González, inxenieru de montes o Gabriel Medina, inxenieru agrícola, técnicos que de xuru van a aportar nun futuru los sos conocimientos pa qu’en Parres nun s’escaeza el frutu que güei pregonamos.
Prestosa idega la de nomar tolos años a la paisana y paisano del añu de Parres y que de ésti son protagonistas el matrimoniu formáu por Dª Covadonga Fondón Blanco y D. Juan Manuel Coviella Coro, de El Veyu de Bada de tola vida, a los que AMIGOS DE PARRES queremos unvia-yos un fuerte abrazu, pues esti reconocimiento si que tien un valor social y humanu perimportante. Supón na más y na menos que reconocer un llabor de munchos años, pues de xuru que na so época, na so xuventú, diben a la gueta, pero non pa trayer les castañes al festival, sinon pa xintales. Pues como decía Manolo Asur, poeta de la cuenca del Nalón, na so ODA A LA CASTAÑA:
Nes fames de posguerra nunca falta,
A cualquiera dafechu lu consuela,
Como una bendición ye la cañuela,
La mayuca y la humilde regoldana.´
El que vaiga a la fiesta la castaña
Y nun nagüe solo con golela,
Anque abondo dé la parpayuela,
Xente nun ye non, de l’asturiana.
Nos cuatro años que AMIGOS DE PARRES ficimos el festival, dionos tiempu a visitar, como ya cuntábamos al entamar esti pregón, a muncha xente de los pueblinos y aldees pa que participasen coles sos castañes y coses de la güerta. Pues nesi caleyar polos pueblos tamién ficimos dalgún trabayu de campo recoyendo opiniones sobre les castañes y d’estes opiniones recoyemos la que nos cuntó un paisano d’un pueblu y que ye lo que sigue darréu:
La castaña ye una especie de nuez cubierta por una corteya dura. Reúnense en grupos de tres o cuatro y tan cubiertes por una cúpula verde con llargos pinchos, llamase l’oriciu, que cuando ta maúra abrese y dexa caer el frutu. Antaño, hacia el mes d’ochobre, xiringábense los castañales con una pértiga pa que cayeren los oricios, dempués abríense y pañábense les castañes. Les que se traíen pa casa xintábense asaes o cocíes, llamábamosles pulguines y siempre s’acompangaben con lleche. Tamién se poníen nel sardu a afumar pa que durasen más tiempo y a estes llamábamosles mayuques. Les castañes que nun se comien nel intre metíense nes cuerries, que son unos cercaos de piedra que se faen en mitá del castañéu y tiénense ellí tol iviernu, pues conservense perbién. Cuandu se diben a recoyer pel iviernu, sacábense de la cuerria y poníense nuna especie de llana que se llamaba campera. Ellí machacábense con una tallera y desfacíense los oricios con un garabato puestu al revés, lluéu pañábense coles fustes o teñaces. Depende el sitiu podíen guetase vizcaínes que son grandes y de piel negra. Roxes, de culu anchu. Forniegues que son tamién roxes pero más pequeñes. Valdunes, grandes y poques en cada oriciu, son persabroses pa asar. Sidres que son oscures y pequeñes. Picuxes, negres y allargaes. Samartiniegues, pequeñes a rayes roxes y blanques. Montesina, roxes, l’oriciu trae munches. Zapatones, castañes de gran tamañu y les regoldones, que son les más inferiores de calidá, son castañes silvestres. Vese qu’el paisano sabía de castañes, pero non solo de castañes tamién de refranes, pues dempués de cuntanos esto díxonos estos refranes: Ente Santiago y Santa Ana enxéndrase la castaña. Magüestu por Navidá y fuxó la señardá. Rellámpagos per San Xuan, castañes lo pagarán. Setiembre secu, castañes en cestu. La castañal pela cota, el carbayu pela picota. De castañes esmondaes, siete u ocho escudiellaes. Castaña la primera y ñuez la postrera. Castaña cayuela, que el gochu nun te cueya. L’asturianu pierde los dientes por beber la sidra frío y comer les castañes calientes. La castaña regalada, dempués de cocida, asada.
Nun hai pregón que se precie que nun seya un poco reivindicativu. Nosotros, AMIGOS DE PARRES, güei nun vamos pedir muncho, solo vamos pedir, queríu Alcalde, qu’el mozu, que ta de buen ver, medre.
Yá, pa dir finando queremos facelo recordando a unos bonos collacios que lleven collaborando con nosotros dende siempre y que sientense totalmente identificáos con Les Arriondes y col Festival de la Castaña, pues lleven participando nelli, coles sos voces y la so allegría, dende que s’entamó. Estos non son otros que EL CUARTETU TORNER qu’el so canciu dedicáu a Les Arriondes acábenlu como nosotros queremos finar esti pregón:
En payares la castaña,
En xunetu fiesta El Bollu,
En agostu Les piragües,
Siempre hai fiestes en Arriondes,
Colos AMIGOS DE PARRES
AMIGOS DE PARRES a 12 de payares de 2006
|
